O ysgrifennu sgriptiau i berfformio a dysgu sgiliau creu theatr – mae Theatr y Torch, Aberdaugleddau yn cynnig hyn oll a mwy yr haf hwn gyda’n Hysgolion Haf blynyddol enwog. Mae’r ysgolion ar gyfer pobl o bob oed a byddant yn cael eu harwain gan dîm proffesiynol mewnol Theatr y Torch.

Mae dau ddigwyddiad i ddewis ohonyn nhw, sef Tall Tales (saith i 11 oed) a Hear Us Roar (11 i 18 oed) gyda'r holl weithgareddau hyn yn cael eu cefnogi gan Ymddiriedolaeth Elusennol Ingles a Phorladd Aberdaugleddau.

Tall Tales yw digwyddiad cyntaf y rhaglen Ysgolion Haf a bydd yn digwydd bob dydd o ddydd Llun 31 Gorffennaf hyd at ddydd Gwener 4 Awst. Cynhelir y sesiynau rhwng 10am a 3pm a bydd y cyfranogwyr yn creu eu stori dylwyth teg eu hunain yn llawn anturiaethau gwych a chwestau hudolus.

Yr ail Ysgol Haf yw Hear Us Roar a bydd yn cael ei chynnal o ddydd Llun 7 Awst i ddydd Gwener 11 Awst gyda sesiynau dyddiol yn dechrau am 10am tan 4pm. Mewn dim ond wythnos, bydd y bobl ifanc yn creu drama fer yn archwilio’r pethau sy’n bwysig iddyn nhw – yn cynnwys gwaith byrfyfyr, ysgrifennu sgriptiau, a dyfeisio technegau.

Nid ydym wedi anghofio am y rhai 18+ oed. Am y tro cyntaf erioed, rydym yn cynnig ysgol haf nos i oedolion. Bydd Show Off! yn rhedeg o ddydd Llun 21 Awst i ddydd Sadwrn 26 Awst, gyda sesiynau o ddydd Llun i ddydd Gwener rhwng 6pm a 9pm, a dydd Sadwrn am y diwrnod cyfan o 10am i 9pm (gan gynnwys perfformiad arddangos yn ein gofod stiwdio). Treuliwch wythnos o sesiynau min nos yn datblygu eich sgiliau perfformio gyda thiwtoriaid arbenigol.

Mae'r holl ddarpariaethau hyn yn cynnwys rhannu ar ddiwedd yr wythnos heb unrhyw gost ychwanegol, lle gall hyd at bedwar gwestai ddod i wylio.

Tim Howe yw Uwch Reolwr Ieuenctid a Chymuned ac mae'n edrych ymlaen yn eiddgar at groesawu pobl i'r Ysgolion Haf. Dywedodd Tim:

“Dewch draw i fod yn greadigol, ac yn fwy na dim i gael hwyl a gwneud ffrindiau newydd! Efallai nad ydych chi am chwennych amlygrwydd ac ymddangos ar lwyfan, efallai y byddai'n well gennych fod y tu ôl i'r llenni, yn ysgrifennu ac yn cyfarwyddo. Gallwn ddarparu ar gyfer pob gallu, ac rydym yn cynnig y croeso cynhesaf i bawb gyda’n sesiynau cynhwysol a hygyrch.”

Ychwanegodd Tim: “Rydym yn ymwybodol bod arian yn dynn ac rydym yn fwy na pharod i drafod cynlluniau talu gyda chi fel y gallwch gymryd rhan gyda ni, wedi’r cyfan, mae theatr i bawb.”

Cadwch lygad ar dudalen cyfryngau cymdeithasol a gwefan Theatr y Torch am newyddion am ein gweithgareddau hydrefol megis y côr cymunedol i oedolion Lleisiau’r Torch, sesiwn Ysgrifennu Creadigol i Oedolion a sesiynau Meithrin Sgiliau, yn ogystal â’n rhaglen Theatr Ieuenctid flaenllaw ar gyfer pobl ifanc rhwng saith a 18 oed. Ymwelwch â’r adran 'Cymryd Rhan' ar y wefan.

I archebu eich lle ar ein Hysgolion Haf, cysylltwch â Swyddfa Docynnau Theatr y Torch ar (01646) 695267.