Mae’n greadigol tu hwnt i eiriau, yn hynod dalentog ac am ddod i’ch adnabod – dewch i gwrdd â Tim Howe, Uwch Reolwr newydd Theatr y Torch - Ieuenctid a Chymuned.

Dim ond ers dechrau 2023 y mae Tim, sy’n wreiddiol o Ddwyrain Canolbarth Lloegr, wedi bod yn ei swydd yn y Torch ac mae eisoes wedi creu argraff yma yn Sir Benfro.

Mae gan Tim gyfoeth o brofiad yn trefnu gweithdai creadigol ac mae’n ymweld ag ysgolion yn rheolaidd i gael y disgyblion i ymgysylltu â’r theatr – o oleuo a chyfarwyddo i ysgrifennu creadigol a pherfformio, gellir cael mynediad i ddosbarthiadau o’r fath yn Theatr y Torch dan lygad barcud Tim a’i dîm creadigol.

Wedi graddio o Brifysgol Aberystwyth ac yna ennill gradd o Ysgol Theatr Old Vic Bryste, mae Tim bob amser wedi bod am weithio yng Nghymru – y wlad mae’n ei alw’n gartref. Pan ddaeth y swydd wag yn y Torch, neidiodd Tim at y cyfle i symud ymhellach i'r gorllewin ac nid yw wedi edrych yn ôl.

“Byth ers gadael Aberystwyth roeddwn yn chwilio am reswm i ddychwelyd i Gymru. Mae Cymru’n teimlo fel cartref i mi ac rwy’n gwybod mai dod i Theatr y Torch oedd y penderfyniad cywir,” esboniodd Tim a fu’n gweithio yn Theatr y Sherman yng Nghaerdydd fel Rheolwr Ymgysylltu Creadigol y lleoliad am dros bum mlynedd.

Mae rôl Tim yn y Torch yn amrywiol ac mae pob diwrnod yn wahanol:

“Mae gweithio yma yn y Torch mor gyffrous. Mewn gwirionedd mae'n fwy creadigol ac anturus na gweithio yn y ddinas. Mae mynd i’r gwaith bob dydd a cherdded ochr yn ochr â’r Hafan a’r Harbwr, gweld cefn gwlad a’i phobl yn teimlo fel cymuned, a’r gymuned honno yr ydym yn ceisio denu yma i’r Torch, i fod yn rhan o’r Torch a chynnig beth maen nhw wir eisiau,” ychwanegodd Tim.

Ar nos Iau, mae Tim yn cynnal gweithdy Sgiliau Creadigol ac Ysgrifennu i rai 18 oed a thros le mae cyfranogwyr yn edrych ar dechnegau ar gyfer perfformio, cyfarwyddo ac ysgrifennu. Yn ogystal â rhannu syniadau artistig mae hyn yn gyfle gwych i gwrdd â phobl newydd. Cynhelir y gweithdy nesaf ar 18 Mai o 8pm tan 10pm.

“A’r hyn sy’n wych am y gweithdai hyn yw nad oes yn rhaid i chi fynychu pob un ohonyn nhw. Efallai na fydd rhai yn apelio ac eraill o ddiddordeb. Does dim rhaid i chi fynychu pob un, dim ond y rhai rydych chi'n meddwl y byddwch chi'n eu mwynhau ac maen nhw oll yn digwydd mewn amgylchedd cyfeillgar, croesawgar yma yn y Torch,” esboniodd Tim.

O Tsiena i St Ives yng Nghernyw, mae Tim wedi gweithio gyda grwpiau theatr ieuenctid ac ym myd y ddrama cyhyd ag y gall gofio, ac mae’r rôl newydd hon yn y Torch wedi plesio’n arw.

“Mae’n anhygoel ac rydw i wedi cyfarfod â nifer o bobl newydd – plant ac oedolion. Mae hyn ynddo'i hun yn eich cadw chi'n greadigol a dyma pam rydw i wrth fy modd yn gwneud yr hyn rydw i'n ei wneud.

“Yn ddiweddar, fe wnaethom ni gynnal gweithdy goleuo a sain ar gyfer Ysgol Gymunedol Pennar, fe wnaethom gynnal sesiwn ysgrifennu Stori Arswyd gydag Ysgol Gynradd Gymunedol Aberdaugleddau ac yn fwy diweddar diwrnod drama a gemau yn Ysgol Gynradd Tavernspite. Mae’n ymwneud ag ymgysylltu ag ysgolion, athrawon a disgyblion a’u hannog i ymddiddori yn yr hyn rydym yn ei wneud yma yn y Torch a’u cael i gymryd rhan – o Geredigion i Sir Benfro a Sir Gaerfyrddin, mae ein drws ar agor i bawb,” meddai Tim.

Bwriad gweithgaredd Theatr y Torch ar gyfer pobl ifanc rhwng saith ac 18 oed yn ogystal ag oedolion yw rhoi mewnwelediadau creadigol rhyngweithiol a diddorol i’r broses o wneud theatr, fel yr eglura Tim.

“Bob wythnos mae ein cyfranogwyr yn cael eu hannog i adeiladu eu hyder trwy sesiynau meithrin sgiliau creadigol a deniadol, dan arweiniad ein tîm ymroddedig. Nid yw'r sesiynau hyn yn ymwneud ag actio a theatr yn unig; rydym yn sicrhau bod pawb yn datblygu eu sgiliau cymdeithasol, datrys problemau, a gwaith tîm. Yn bwysicaf oll, rydym am i bobl gael hwyl a gwneud ffrindiau newydd.

“Mae Theatr y Torch yn ofod croesawgar i bawb. Ein nod yw gwneud addasiadau rhesymol i’n darpariaeth er mwyn sicrhau bod pob grŵp yn addas i bawb, fel y gall pawb wneud y gorau o’u profiadau.”

Gorffennodd Tim: “Rydym yn ceisio cynnwys pobl mewn mannau diogel creadigol sy'n caniatáu iddynt fynegi eu hunain; i weithio allan beth sy'n bwysig iddyn nhw, beth maen nhw'n angerddol amdano, a sut i ddweud wrth bawb am hynny. Rydyn ni’n credu bod gan bawb rydyn ni’n gweithio gyda nhw y pŵer i wneud eu straeon eu hunain, a newid sut rydyn ni oll yn gweld ein byd. Rydym yn croesawu pawb ac yn edrych ymlaen at eich gweld yn rhai o’n gweithgaredd cyn hir.”

Am fwy o wybodaeth yn ymwneud â’r gweithdy, ymweliadau ysgol a Theatr Ieuenctid y Torch, cysylltwch â 01646 695267.

Llun: gan Chris Lloyd