Cawr o Gystadleuaeth!

Wrth i Theatr Torch baratoi ar gyfer ei phantomeim Nadoligaidd o Jack and the Beanstalk fis Rhagfyr eleni, mae mawr angen eich help. Rhywle yn Cloudland, yn ddwfn yng nghanol castell y Cawr mae ystafell arbennig iawn - yn llawn gwrthrychau euraid hardd. Mae'r gwrthrychau disglair hyn yn amhrisiadwy, wedi'u gorchuddio â'r patrymau mwyaf ysblennydd, ac wedi'u haddurno â thlysau. Er hynny, nid yw'r trysorau hyn yn perthyn i'r Cawr - maen nhw'n perthyn i bawb yma ar y ddaear, ac mae Jack am iddyn nhw ddychwelyd!

Ond beth ar y ddaear yw'r gwrthrychau hyn, pa siâp ydyn nhw, o beth maen nhw wedi'u gwneud? Rydyn ni angen i'ch pobl ifanc feddwl am bethau sy'n werthfawr iddyn nhw a dylunio gwrthrych arbennig ysblennydd i Jack ei achub rhag y Cawr!

“Roedden ni wrth ein bodd gyda chynllun ffrog ddawns gwych y llynedd ar gyfer Beauty and the Beast fel ein bod ni’n meddwl am osod her arall i bobl ifanc ar draws ein sir! Felly dyma hi - gwirion neu gall, rydyn ni am weld yr holl syniadau sydd gennych chi am wrthrych arbennig yn ystafell y cawr - a allai fod yn brwsh toiled euraid? Diemyntau yn gorchuddio X-Box? Neu a yw'n sychwr gwallt emrallt? Chi sydd i benderfynu...,” esboniodd Tim Howe, Uwch Reolwr Ieuenctid a Chymuned Theatr Torch.

Ychwanegodd Tim: “Gallai’r lluniau dylunio fod ar unrhyw ffurf. Gellir eu gwneud o ludwaith o ddelweddau a gweadau, toriadau allan o gylchgronau, stribedi o ddeunydd, wedi’u creu ar y cyfrifiadur neu gallent gael eu tynnu â llaw – gadewch i ddychymyg y bobl ifanc redeg yn wyllt. A pheidiwch ag anghofio rhoi disgrifiad cyflym o'ch dyluniad ar y cefn, nid ydym am i unrhyw flychau X-Box gael eu camgymryd am frwshys toiled!”

Mae tri chategori oedran: Dan 5, 5 – 10 ac 11 – 18. Bydd enillydd yn cael ei ddewis o bob un categori, a bydd enillydd cyffredinol yn gweld eu dyluniad yn cael ei wneud yn wrthrych go iawn yn y pantomeim. Bydd yr holl ddyluniadau yn cael eu harddangos yn Oriel Joanna Field Theatr Torch yn ystod mis Rhagfyr i bawb eu gweld.

Y dyddiad cau ar gyfer ceisiadau yw dydd Gwener 4 Hydref 2024.

Dylai’r holl ddelweddau fod ar ddarn o bapur A4 a dim mwy. Dylai gynnwys yr wybodaeth ganlynol ar y cefn: enw’r dylunydd, yr ysgol/coleg y maent yn ei mynychu, disgrifiad byr o beth yw eu gwrthrych, a manylion cyswllt rhywun dros 18 oed.

Dylid anfon ceisiadau i: Ystafell Drysor y Cawr, Theatr Torch, Heol San Pedr, Aberdaugleddau, Sir Benfro, SA73 2BU. Fel arall, dewch â nhw i Swyddfa Docynnau Theatr Torch.

Photo by Chris Lloyd - Enillydd dyluniad cynllunio Ffrog ar gyfer Belle y llynedd, oedd Ioan, naw oed o Ddinbych y Pysgod.