Cronfa Cyfoethogi Sir Benfro yn cefnogi Gwaith Addysg Theatr Torch

Mae Theatr Torch yn Aberdaugleddau yn falch iawn o dderbyn Cronfa Cyfoethogi Sir Benfro, sy’n rhan o raglen adfywio Cyngor Sir Penfro, er mwyn cyflwyno tymor o sesiynau celfyddydau mynegiannol yn Ysgol Gynradd Gymunedol Aberdaugleddau.

Mae tîm proffesiynol Theatr Torch wedi dechrau gweithio gyda disgyblion blwyddyn 5 yr ysgol ar brosiect ysgrifennu dramâu a dylunio theatr. Mae’r gweithgaredd creadigol cyffrous hwn wedi’i greu i gefnogi’r ysgol i ddatblygu sgiliau Ieithoedd, Llythrennedd a Chyfathrebu’r bobl ifanc.

“Rydym yn hynod falch o fod yn gweithio gydag Ysgol Gynradd Gymunedol Aberdaugleddau ar y prosiect hwn ac ni allem fod yn ei wneud heb gefnogaeth Cyngor Sir Penfro a Chronfa Cyfoethogi Sir Benfro,” meddai Tim Howe, Uwch Reolwr Ieuenctid a Chymuned y Torch.

Ychwanegodd Tim: “Rydym yn gwybod y bydd darparu’r cyfle hwn i’r myfyrwyr a’r staff yn cael effaith ystyrlon a pharhaol. Nid yn unig y bydd ein pobl ifanc yn gwella eu sgiliau llythrennedd, ond rydym hefyd yn gobeithio y bydd yn rhoi dyheadau iddynt fod yn rhan o’r sector creadigol. Pwy a ŵyr y gallen nhw fod yn ysgrifennu dramâu ar gyfer Theatr  Torch ryw ddydd.”

Mae'r dramodydd Katie Elin Salt a'r Dylunydd Theatr Ruth Stringer yn rhoi gwersi bob prynhawn dydd Mawrth ac Iau yn yr ysgol. Mae’r myfyrwyr yn gobeithio creu drama epig sy’n cyfuno awduron enwog â thechnoleg. Mae'n argoeli i gael ei llenwi â throeon dramatig yn ogystal â setiau a gwisgoedd ysblennydd, oll wedi'u creu gan y bobl ifanc eu hunain.

Ar ddiwedd y prosiect 11 wythnos, bydd y bobl ifanc yn rhannu eu gwaith caled mewn perfformiad ar gyfer eu ffrindiau a’u teulu yn theatr stiwdio’r Torch.

Dywedodd un o’r disgyblion sy’n rhan o’r prosiect:

“Rydw i wir wedi mwynhau gweithio gyda Theatr Torch y tymor hwn gan fod y Torch wedi fy helpu i ddeall sut mae drama’n cael ei rhoi at ei gilydd. Fy hoff ran oedd gwneud y popty a’r meicrodon i’w defnyddio fel propiau gyda Ruth, fe wnes i fwynhau gwneud y sgript gyda Katie a Tim hefyd.”

“Mae’r disgyblion wedi mwynhau eu sesiynau gyda Katie a Ruth yn fawr. Mae gan rai o’n pobl ifanc eisoes brofiad o weithio gyda Tim, trwy raglen theatr ieuenctid y Torch, felly rydym wedi bod yn falch iawn o’i groesawu i amgylchedd eu hysgol. Gan weithio ochr yn ochr â’n gilydd rydym wedi gallu rhedeg edefyn hudolus sy’n cysylltu ein dysgu testun Dysgu Rhyngddisgyblaethol â meysydd arbenigedd y gweithwyr proffesiynol medrus, gan ddarparu cysylltiadau sy’n procio’r meddwl gyda’n dysgu ehangach,” meddai Rhian Johnson, arweinydd Grŵp Blwyddyn ar gyfer Blwyddyn 5 yn yr ysgol.

Parhaodd Rhian: “Mae'r plant wedi creu sgriptiau gwych ac yn awr yn y broses o greu propiau i gynorthwyo perfformiadau eu sioe sydd ar ddod; Awduron Enwog. Mae’n daith wyllt o lenyddiaeth gyfoes a chlasurol i blant ynghyd â’r dechnoleg ddiweddaraf – maen nhw’n edrych ymlaen at ddychwelyd i’r gweithdai ar ôl hanner tymor!”

Ochr yn ochr â’r prosiect mae rhan o’r cyllid yn cefnogi sesiynau hyfforddi athrawon am ddim ychwanegol ledled Sir Benfro a thu hwnt. Bydd y rhain yn cael eu cynnal yn y Torch yn nhymhorau’r hydref a’r gwanwyn, gyda gweithwyr theatr proffesiynol yn cyflwyno gweithgarwch yn ymwneud ag ysgrifennu creadigol, goleuo, sain a dylunio theatr.

Wrth ddod i glo, dywedodd Tim: “Un o egwyddorion sylfaenol y Torch am bron i 50 mlynedd yn ôl oedd darparu cyfleoedd addysgol i’n cymuned drwy’r celfyddydau. Mae’r agwedd honno’n parhau heddiw gyda’r prosiect hwn. Ein huchelgais yw bod yn rhan hanfodol o’r dirwedd addysgol yn Sir Benfro ac ar draws gorllewin Cymru.”