Tîm Torch yn Heidio am Safle’r Sioe Sirol

Wrth i drefnwyr Sioe Amaethyddol Sir Benfro baratoi ar gyfer y digwyddiad deuddydd yr wythnos hon, mae aelodau o Dîm y Torch hefyd yn eu hanterth yn paratoi i gyfarfod a chyfarch cwsmeriaid hen a newydd o’u stondin ar faes y sioe.

Ar ddydd Mercher 14 a dydd Iau 15 Awst, bydd stondin Theatr Torch, a leolir ym Mhabell Awdurdod Porthladd Aberdaugleddau (ger y Neuadd Fwyd) yn fwrlwm i blant ac oedolion fel ei gilydd. Gall y rheiny sy’n ymweld â'r stondin wisgo i fyny a chael tynnu eu llun yn y bwth lluniau gyda phropiau a gwisgoedd a ddefnyddiwyd mewn cynyrchiadau blaenorol Theatr Torch, a hynny o flaen cefnlen ddisglair. Bydd gweithgarwch crefft hefyd i'r bobl ifanc er mwyn iddyn nhw fod yn greadigol.

Dywedodd Cyfarwyddwr Artistig Theatr Torch, Chelsey Gillard:

“Mae’n hanfodol bwysig bod Theatr Torch yn mynd allan i’r gymuned ac yn mynychu Sioe Sir Benfro, y sioe ddeuddydd fwyaf yn y sir. Mae’n gyfle gwych i arddangos yr hyn rydym yn ei wneud yma yn y Torch yn Aberdaugleddau ac i gymryd rhan mewn gweithgareddau cymunedol.”

Bydd dydd Mercher a dydd Iau hefyd yn gweld lansiad swyddogol dychweliad cynhyrchiad gwreiddiol gwobrwyedig Theatr Torch sef 'Grav' a fydd yn cael rhediad cyfyngedig yn Theatr Torch fis Hydref eleni i ddathlu ei 200fed sioe a 10 mlynedd ers ei perfformiad cyntaf. Wedi teithio ledled y byd, mae’r sioe un dyn gyffrous hon yn seiliedig ar fywyd y chwaraewr rygbi, actor, eicon diwylliannol, tad, a gŵr – Ray Gravell. Gŵr â bywyd yn llawn straeon sy’n haeddu cael eu clywed unwaith eto ar y llwyfan ac ar y cae rygbi.

Ychwanegodd Chelsey: “Am ffordd i ddathlu 200fed perfformiad Grav nag yma yn Theatr Torch, lle dechreuodd y cyfan 10 mlynedd yn ôl. Mae’r cynhyrchiad wedi teithio’r byd, a gellir ei weld yma lle dechreuodd y cyfan yn y Torch o 9-11 Hydref gyda Noson Gala i ddathlu’r 200fed Perfformiad ar ddydd Sadwrn 12.”

Bydd y gystadleuaeth dylunio set ar gyfer pobl ifanc hyd at 18 oed hefyd yn cael ei lansio yn y sioe ar gyfer y pantomeim Nadoligaidd blynyddol – eleni Jack and the Beanstalk.

Rhywle yn Cloudland, yn ddwfn yng nghanol castell y Cawr mae ystafell arbennig iawn. Ystafell yn llawn gwrthrychau euraid hardd. Mae'r gwrthrychau hyn yn amhrisiadwy, wedi'u gorchuddio â'r patrymau mwyaf ysblennydd, ac wedi'u haddurno â thlysau a gliter. Er hynny, nid yw'r trysorau hyn yn perthyn i'r Cawr, maent yn perthyn i bawb i lawr yma ar y ddaear, ac mae Jac am eu cael yn ôl!

Ond beth ar y ddaear yw'r gwrthrychau hyn, pa siâp ydyn nhw, o beth maen nhw wedi'i wneud? Rydyn ni angen i'ch pobl ifanc feddwl am bethau sy'n werthfawr iddyn nhw a dylunio gwrthrych arbennig ysblennydd i Jac ei achub rhag y Cawr! Yn wirion neu'n synhwyrol rydyn ni am eu gweld nhw - gallai fod yn frwsh toiled euraid? Yn X-Box diemwnt? Neu a yw'n sychwr gwallt emrallt? Chi sydd i ddychmygu...

Gallai'r lluniau dylunio fod ar unrhyw ffurf. Gellir eu gwneud o ludwaith o ddelweddau a gweadau, toriadau allan o gylchgronau, stribedi o ddeunydd, wedi’u creu ar y cyfrifiadur neu gallent gael eu tynnu â llaw – gadewch i ddychymyg y bobl ifanc fynd ar garlam.

Mae tri chategori oedran: Dan 5, 5 – 10 ac 11 – 18. Caiff yr enillydd ei ddewis o bob categori, a bydd enillydd cyffredinol yn gweld eu dyluniad yn cael ei wneud yn wrthrych go iawn ar gyfer y pantomeim. Bydd yr holl ddyluniadau yn cael eu harddangos yng ngofod Oriel Joanna Field yn Theatr Torch yn ystod mis Rhagfyr. Y dyddiad cau ar gyfer ceisiadau yw dydd Gwener 4 Hydref 2024.