Gyda'r Nadolig rownd y gornel, mae traddodiad Nadoligaidd teuluol yn dychwelyd i Theatr y Torch, Aberdaugleddau, gyda'i holl hwyl a disgleirdeb hudolus! Ydy, mae'r pantomeim yn ôl! Eleni, Cinderella, y stori dylwyth teg fydd yn difyrru cynulleidfaoedd, gyda'r prif gymeriad, Rosey Cale yn dod o Sir Benfro.

Gyda noson agoriadol ar yr 16eg o Ragfyr a’r perfformiad diwethaf Nos Galan, mae tocynnau wedi bod yn gwerthu’n gyflym ers iddynt gael eu rhyddhau yn gynharach eleni. Oherwydd y galw poblogaidd, mae’r tîm yn Theatr y Torch wedi cyhoeddi heddiw bod perfformiadau ychwanegol wedi’u hychwanegu. Felly, mae cyfle o hyd i gael eich tocyn i'r Ddawns!

Meddai Cinderella ei hun, Rosey Cale:

“Mae’n bleser bod yn rhan o Bantomeim Theatr y Torch eleni. Rwy'n cofio dod i'r Torch fel plentyn gyda fy ysgol a fy nheulu, roedd bob amser yn rhywbeth roeddem yn edrych ymlaen ato yn y cyfnod cyn y Nadolig ac felly mae'n anrhydedd wirioneddol bod ar y llwyfan eleni fel Cinderella! ”

Mae hoff Fonesig Sir Benfro, Dion Davies, yn dychwelyd fel un o’r Chwiorydd Hyll, Eugiene, ac mae’r digrifwr a’r actor poblogaidd Dave Ainsworth yn ymgymryd â rôl y Dihiryn Pantomeim fel Barron Hardup, booooo! Yn ymuno â’r ddeuawd mae James Mack sy’n chwarae chwaer hyd yn oed yn fwy prydferth Eugiene, Hygiene, a, Miriam O’Brien fel y Dandini swynol.

Yn ogystal â rhai wynebau cyfarwydd ar lwyfan y Torch, yn dilyn 23 mlynedd fel Gwirfoddolwr Hynod yn y theatr, bydd David Woodham yn troedio’r byrddau pantomeim am y tro cyntaf. Ymhlith y cyd-ddechreuwyr mae actor o Aberdaugleddau a chyn aelod Theatr Ieuenctid Torch, Samuel Freeman fel y Tywysog, Gareth Howard o Sir Gaerfyrddin fel Buttons ac Amelia Ryan a fydd yn chwarae rhan y Fairy Godmother.

Gan siarad am ei ymddangosiad cyntaf ym Mhanto'r Torch dywedodd David, “Rydw i mor gyffrous i fod yn gysylltiedig â Cinderella eleni. Rydw i wedi gweithio yn y Torch ers 23 mlynedd ac roeddwn i bob amser eisiau bod ar y llwyfan yn y pantomeim. Gofynnais i Peter (Cyfarwyddwr Artistig Theatr y Torch) a oedd modd i gymryd rhan ac eleni mae wedi gwneud iddo ddigwydd o'r diwedd. Ni allaf aros i Cinderella agor. ”

Bydd y sioe yn cael ei goruchwylio gan gyfarwyddwr arobryn y Torch, Peter Doran, wnaeth ychwanegu:

“Rydyn ni wrth ein bodd ein bod yn dod â Phantomeim yn ôl i lwyfan y Torch eleni, fe wnaethom oll fethu’r wefr Nadoligaidd honno y llynedd, ac felly rydyn ni’n benderfynol o’i gwneud y panto mwyaf a’r gorau rydyn ni erioed wedi’i gynhyrchu. Mae'r cast wedi bod yn brysur yn ymarfer ers nifer o wythnosau bellach, ac ni allwn aros i ddangos y perfformiad gorffenedig i chi! Mae'n wych ein bod ni'n gorfod rhoi dyddiadau ychwanegol; mae'n ymddangos, er gwaethaf popeth sy'n digwydd, bod ein cynulleidfa'n benderfynol o gael amser gwych y Nadolig hwn a gallwn yn sicr warantu mai dyma beth fydd yn eu disgwyl yma ym Mhantomeim y Torch. "

Cinderella fydd y 177fed cynhyrchiad a grëwyd gan y cwmni theatr proffesiynol sydd wedi bod yn cynhyrchu sioeau Nadolig i gynulleidfaoedd Sir Benfro ers dros 40 mlynedd. I gael eich tocynnau cliciwch yma.

Cofiwch, er mwyn mynychu'r pantomeim ac er mwyn cydymffurfio â gofynion cyfredol Llywodraeth Cymru, bydd angen Tocyn Covid dilys, neu brawf o brawf llif ochrol negyddol ar gyfer y rhai 18 oed a hŷn.