Dyma Ellie Rose, Cyfarwyddwr Cynorthwyol ar y cynhyrchiad o Kill Thy Neighbour. Wedi ei geni yn Hwlffordd a threulio ei phlentyndod yn Llandudoch, mae Ellie wedi cael amser anhygoel yn gweithio ar y cynhyrchiad hwn ochr yn ochr â Chelsey Gillard, Cyfarwyddwr Artistig Theatr Torch. Bydd y sioe gomedi newydd sbon hon ar lwyfan y Torch, yma yn Aberdaugleddau o 24 Ebrill i 4 Mai. Dewch i ddarllen isod am ei hanturiaethau wrth iddi weithio ar y cynhyrchiad cyffrous hwn ar y cyd â Theatr Clwyd.

Wythnos 1

Y diwrnod cyntaf ac mae pawb yn gyffrous, ychydig yn nerfus ac yn bryderus i ddechrau. Fe wnaethon ni gwrdd â'r tîm cyfan sy'n gweithio ar y prosiect yma yn y Torch ac yn Theatr Clwyd - ac rwy'n golygu’r tîm cyfan! Mae pawb yn garedig, yn groesawgar ac wrth eu bodd i ddechrau'r cynhyrchiad newydd hwn. Mae Kill Thy Neighbour gan Lucie Lovatt, yn ymuno â ni drwy’r wythnos, i weithio drwy’r sgript newydd a datblygu unrhyw newidiadau ochr yn ochr â’r actorion a’n cyfarwyddwr artistig, Chelsey Gillard.

Dyma’r tro cyntaf i mi weithio ar ddrama theatr ranbarthol ar raddfa mor fawr, ac roeddwn i’n bryderus y byddwn i allan o le, ddim yn ddigon da neu ar yr ymylon. Ond mae'r wythnos hon wedi profi fy amheuaeth o fod yn anghywir. Mae'r ffordd y mae Chelsey yn symbylu'r tîm, yn cofleidio syniadau pawb, yn dod â ni at ein gilydd. Mae hi'n gydweithredwr ac yn hwylusydd rhyfeddol. Mae Lucie, hefyd, mor ostyngedig, manwl gywir a hael wrth wrando ar syniadau a chaniatáu iddyn nhw lunio eu geiriau.

Bob bore, byddwn yn dod ynghyd ac yn trafod clecs y dydd, yn rhannu storiâu ac yn ymchwilio unrhyw syniadau sy’n cysylltu byd y ddrama i’r cymeriadau hynod yma a’u teithiau. Yna byddwn yn dechrau ar y gwaith o amgylch y bwrdd; byddwn yn darllen rhannau o’r sgript ac yn eu cwtogi, yn golygu, gwneud newidiadau ac yn ail-ddarllen y deialog; i wirio a ydyn nhw dal yn berthnasol i’r stori. Rydym yn chwerthin, yn yfed un disied o de ar ȏl y llall ac yn deifio’n syth i bentref ffug Porth y Graith.

Rwyf wir yn gyffrous cael bwrw ati ar gyfer yr ail wythnos!

Wythnos 2

Yr wythnos hon rydym yn dechrau dod â’r golygfeydd yn fyw. Byddwn yn gweithio ar Act 1 Golygfa 1 yr holl ffordd i Act 3 Golygfa 3 o ddydd Llun i ddydd Iau. Cafodd yr actorion gyfle i chwarae ar y llwyfan, ei deimlo a’i gwneud yn gartref. Mae cynllun y set gan Elin Steele wir yn fanwl, yn llawn gwead ac oed, mae’n fy atgoffa cymaint o fwthyn 19eg fy mam-gu ger Boncath. Mae cymaint o’r ddrama hon yn fy nghludo adref i Sir Benfro.

Mae ‘na dipyn o linellau gan bob actor! Mae gan bob un ohonyn nhw ddull ei hun i’w dysgu, a diddorol yw gweld sut mae pob actor yn cyflwyno ei broses unigryw ei hun i wireddu hyn.

Ddydd Mawrth, cawsom ein cyfarfod cynhyrchu wythnosol. Dyma ble mae pob aelod o’r criw a’r tîm creadigol yn dod ynghyd i drafod rhannau technegol y sioe fel goleuo, sain, rigio, adeiladu set a gwisgoedd. Mae’n wych cael bod yn rhan o dîm cryf a chydlynol. Fel arfer, mewn sioeau bach, neu ymylol neu ar y cyd (tu allan i theatr rhanbarthol neu genedlethol), efallai bydd yn rhaid i mi gyfarwyddo a rhannu cyfrifoldebau ar gyfer dod o hyd i wisgoedd, marchnata, amserlenni ac ati. Felly, mae cael ffocysu ar yr ystafell ymarfer yn unig wir yn rhodd.

Byddwn yn rhedeg yfory am y tro cyntaf. Croeswch eich bysedd!

Wythnos 3 & 4

Treuliwyd y pythefnos diwethaf yn ymarfer y golygfeydd ac yn gosod seiliau cadarn y ddrama at ei gilydd. Pan fyddwch chi'n clywed y geiriau'n cael eu llefaru dro ar ôl tro, rydych chi'n clywed pethau newydd. Mae cymhlethdodau a dyfnderoedd ysgrifennu Lucie, y cymeriadau hardd hyn, yn dal i ddatgelu eu hunain.

Mae gennym ni beiriant coffi go iawn yn yr ystafell werdd (yr ystafell lle gall y cwmni dreulio amser segur) ac rydw i wedi dod yn brofiadol mewn gwneud lattes ceirch ac espresso - sgil bwysig iawn ar gyfer y dyddiau ymarfer hir hyn!

Rwyf wedi dysgu cymaint am weithio gyda thîm creadigol mawr a chyfrifoldeb y cyfarwyddwr i feithrin amgylchedd diogel, cynhwysol, llawen; ar wrando, rhoi nodiadau, cyfeiriad ac adborth. Rydym hefyd wedi gweithio gyda Bethan, ein cydlynydd agosatrwydd, ar ddwy sesiwn. Ei rôl yw sicrhau bod gan yr actorion ymreolaeth lawn a dewisiadau gwahanol o ran agwedd a chyflwyniad eiliadau agos yn y ddrama.

Yn olaf, cawsom ymweliad gan Heno, a fu’n ffilmio ac yn cyfweld â’r cast i’r wasg ar gyfer y sioe. Cadwch lygad am yr eitem!

Wythnos Dechnegol

Rydyn ni wedi cyrraedd yr wythnos dechnegol!

Dyma'r wythnos rydyn ni'n trosglwyddo o’r ystafell ymarfer i’r llwyfan perfformio. Cawn weld y set am y tro cyntaf, y cynllun goleuo, yr holl wisgoedd a chlywed y sgôr. Mae'r cyfan yn ffantastig!

Cawn weld gweledigaeth lawn y sioe yn dod at ei gilydd. Mae gan actorion y gwaith o addasu i'r lle ac i'r awditoriwm. Mae Tic Ashfield, y cyfansoddwr, wedi creu sain anhygoel gan ddefnyddio harmoniwm byw wedi'i recordio a phiano yn syth o'r 1950au. Defnyddiodd samplau o biano toredig, allan o diwn y daeth o hyd iddo yn Theatr Clwyd nôl yn 2014 i greu’r eiliadau cerddorol tywyllach, ynghyd â brwshys ar ddrwm magl baróc, sither a drwm bodhran. I mi mae’n cynhyrfu teimlad y môr a gwylltineb Mynyddoedd y Preseli. Mae yna unigrwydd a heddwch i’r sŵn – rhywbeth sy’n fy atgoffa o sefyll ar draeth gwyntog y gaeaf yn Nolton Haven, yn gwylio’r tonnau’n chwalu ac yn adeiladu.

Fy ngwaith yw cadw llygad ar y sgript, llinellau gweld a chefnogi'n gyffredinol yr hyn sydd ei angen ar Chelsey! Rydyn ni wedi bwyta llawer o Haribo.

Rydym yn barod i'r gynulleidfa ddod i ymuno â ni; i chwerthin, llefain ac ebychu gydag hyfrydwch. A dydw i ddim yn barod i'r sioe hon ddod i ben! Mae dod i’r gwaith bob dydd gydag unigolion mor dalentog, chwareus, anhygoel wedi bod yn un o’r amserau gorau i mi ei gael erioed ym myd theatr.