Theatr Torch yn cyhoeddi dyddiad gadael y Prif Weithredwr Benjamin Lloyd, ar ôl 5 mlynedd wrth y llyw

Mae Theatr Torch, canolfan y celfyddydau yn Sir Benfro ac un o theatrau cynhyrchu amlycaf Cymru heddiw yn cyhoeddi diwrnod diwethaf y Cyfarwyddwr Gweithredol Benjamin Lloyd yn y gwaith ar ôl pum mlynedd hanesyddol wrth y llyw.

Mae cyfnod Ben yn y Torch wedi gweld isafbwyntiau’r pandemig a’r penderfyniad dilynol i oroesi a ffynnu, gan barhau i wasanaethu ein cymunedau drwyddi draw, ac uchafbwyntiau’r Torch yn ei 45 blwyddyn a wnaeth dorri record. Mae Ben wedi goruchwylio adnewyddiad cyffrous o arweinyddiaeth artistig, partneriaethau cenedlaethol mawr a chyd-gynyrchiadau ac ailddyblu eto ymrwymiad y Torch i’r ifanc, bregus a heb gynrychiolaeth ddigonol yn ein cymuned gyda sefydlu adran Ieuenctid a Chymuned bwrpasol.

Ymhlith yr uchafbwyntiau parhaus mae prosiect ymgysylltu Stori Sir Benfro a ddaeth ag artistiaid a chymunedau ynghyd yn ystod y pandemig wrth adeiladu archif byw o straeon; blwyddyn ben-blwydd aruthrol yn 2022 a welodd bum cynhyrchiad y Torch, teithiau o amgylch Cymru a’r DU a rhediadau yn Llundain a Chaeredin gyda chymysgedd o ysgrifennu newydd a chlasuron y Torch; sefydlu partneriaeth arloesol ‘Craidd’, a sicrhau cyllid hirdymor gyda’r nod o ddileu rhwystrau i theatr brif ffrwd ar gyfer artistiaid a gweithwyr llawrydd byddar, anabl a niwrowahanol; a chyflawni cynnydd hanfodol mewn cyllid fel rhan o Adolygiad Buddsoddi Cyngor Celfyddydau Cymru, gan sicrhau safle strategol y Torch sydd ar flaen y gad mewn theatrau yma yng Nghymru a mynd yn groes i’r duedd o doriadau cyllid yn gyffredinol.

Dywedodd Benjamin Lloyd, y Cyfarwyddwr Gweithredol:

“Anrhydedd fy ngyrfa broffesiynol oedd arwain y theatr, sydd wedi rhoi amlygiad cyntaf i gynifer ohonom yng ngorllewin Cymru, o gelfyddydau perfformio o safon uchel yn ei holl ffurfiau. Mae’r Torch yn wyrth fach yn hinsawdd ariannu heddiw ac yn adnodd gwerthfawr i’r gymuned. Mae’n cynrychioli ffenestr i’r byd y tu hwnt ac yn achubiaeth i gynifer – yn ifanc, yn hen, yn ynysig ac yn agored i niwed – yn y rhan brydferth, bellennig hon o’r byd. Rwyf yn hynod falch o ymrwymiad, sgil, dynoliaeth ac angerdd y tîm o dan fy arweinyddiaeth ac mae’r hyn yr ydym wedi’i gyflawni gyda’n gilydd mewn cyfnodau anodd wedi bod yn drawiadol, gan gyflawni i’n cymuned a chefnogi ecoleg y celfyddydau yng Nghymru mewn ffyrdd gweladwy ac anweledig.

“Er hynny, mae’r ymrwymiad sydd ei angen i gynnal y Torch drwy gydol y cyfnod hwn wedi bod yn ddi-derfyn ac wedi bod yn anodd i mi ac i’m teulu ifanc. Nawr yw'r amser i mi drosglwyddo'r ffagl ac adennill rhywfaint o gydbwysedd. Mae gennyf hyder llwyr yn arweinyddiaeth artistig y Torch o dan Chelsey Gillard, a ffydd yn y tîm i barhau ar y llwybr cyffrous hwn. Wrth i mi gamu i ffwrdd o’n swydd, byddaf yn cymryd peth amser gyda fy nheulu cyn mynd ar drywydd cyfleoedd newydd wrth i ni edrych ymlaen at ein hantur nesaf. Byddaf yn mwynhau dathlu a chefnogi’r Torch unwaith eto fel noddwr ac yn edrych ymlaen at gyfrannu gydag egni a phersbectif ffres i’r celfyddydau a’r sgwrs ddiwylliannol yng Nghymru a thu hwnt.

“Nid oes byth eiliad berffaith i gamu o’r neilltu ond ar ôl bod mewn deialog ers peth amser ynglŷn â sut a phryd y byddwn yn gwneud y newid hwn, a chyda chyllid a chefnogaeth hirdymor wedi’u sicrhau ar gyfer arloesedd artistig a datblygiad sefydliadol, rwyf wedi penderfynu gyda’r Bwrdd, mai dyma'r amser i adael. Felly, rwy'n camu i lawr o heddiw ymlaen gyda threfniadau dros dro ar waith wrth i'r Bwrdd adolygu'r cynllun strategol a'r amcanion ar gyfer fy olynydd.

“Hoffwn ddiolch i’r timau staff a gwirfoddolwyr (o’r gorffennol a’r presennol) sy’n mynd gam ymhellach a thu hwnt i roi croeso cynnes a phrofiadau sy’n cyfoethogi bywyd ein noddwyr. Diolch yn ddiffuant hefyd i’n partneriaid, cyllidwyr – yn enwedig cydweithwyr yng Nghyngor Celfyddydau Cymru – noddwyr, cefnogwyr ac yn bennaf oll aelodau ein cynulleidfa. Mae pawb wedi ymddiried yn fy hyder i arwain ac ansawdd y ddarpariaeth artistig a chymunedol a ddarperir gan ein tîm, gyda’u cefnogaeth trwy gydol fy mlynyddoedd yn y swydd – yn ariannol ac fel arall – ac mae wedi cael ei werthfawrogi’n fawr iawn.

“Hoffwn orffen y datganiad hwn ar ran y Torch i annog y llywodraeth ar bob lefel i gydnabod nid yn unig y buddion economaidd a llesiant y mae’r celfyddydau yn eu cynhyrchu a’u darparu, ond hefyd y cyfraniadau hanfodol y mae’r celfyddydau ac yn arbennig, lleoliad fel y Torch yn gwneud i wead diwylliannol eu cymuned a chymdeithas yn gyffredinol. Er hynny, ni all lleoliadau o’r fath o fewn y sector celfyddydol a ariennir barhau i fodoli ar sail ewyllys da ac ymrwymiad eu gweithlu estynedig ac mae angen cyllid a chymorth digonol arnynt os ydynt am barhau i ffynnu. Dylid gwarchod y celfyddydau. a Charu’r Torch.”

Dywedodd Cadeirydd Bwrdd Rheoli Theatr Torch, Katrina Marsh: 

“Ar ran y Bwrdd a’r tîm staff estynnwn ein diolch i Ben am ei ymroddiad a’i arweiniad drwy’r cyfnod mwyaf heriol yn ein hanes. Mae ei ymroddiad i Theatr Torch, ei hartistiaid a phobl Sir Benfro wedi gadael etifeddiaeth y byddwn yn ceisio’i hamddiffyn ac adeiladu arni. Dymunwn yn dda i Ben a’i deulu yn eu hymdrechion yn y dyfodol a byddwn yn gweithio gyda’r uwch dîm rheoli i barhau i gyflawni ein cynlluniau gweithredol a strategol.”