Amserlen Orlawn yn y Torch

Mae’n adeg cyffrous iawn yn Theatr Torch y gwanwyn a’r haf hwn ac yn dechrau gyda chynhyrchiad Gwanwyn Theatr Ieuenctid y Torch o Ravers, yna cynhyrchiad Theatr Ieuenctid yr Haf o The Bangers and Chips Explosion gan Brough Girling. Yn olaf mae’r ysgolion haf hynod boblogaidd yn dychwelyd gyda chyfleoedd i Blant Iau, Hŷn ac Oedolion – mae yna rywbeth at ddant pawb!

Dim ond ychydig wythnosau sydd yna cyn ein cynhyrchiad diweddaraf Theatr Ieuenctid y Torch, Ravers, sy'n argoeli i fod yn noson llawn hwyl a chomedi. Mae’r ddrama newydd sbon hon a ysgrifennwyd gan Rikki Beadle-Blair yn benodol ar gyfer pobl ifanc 15-18 oed, ac ar lwyfan y theatr stiwdio o ddydd Iau 6 Mawrth tan ddydd Sadwrn 8 Mawrth gyda pherfformiadau’n dechrau am 7.30pm bob nos. Peidiwch ag anghofio cael eich tocynnau!

Mae Theatr Torch yn sicrhau bod rhywbeth ar eich cyfer yr haf hwn hefyd! Mae ymarferion yn dechrau ar gyfer eu cynhyrchiad theatr ieuenctid The Bangers and Chips Explosion ym mis Ebrill. Mae'r ddrama yn seiliedig ar nofel boblogaidd i blant ac wedi'i haddasu'n arbennig ar gyfer theatr ieuenctid yn union fel y rhai yn y Torch. Mae Roald Dahl yn cwrdd â David Walliams yn y gomedi wyllt, sy’n gyfeillgar i’r teulu, ac sy’n argoeli i fod yn brofiad gwych i holl aelodau’r theatr ieuenctid. Bydd ar lwyfan y Torch o 21 i 23 Gorffennaf.

“Mae yna gymaint o gymeriadau gwych i’n hactorion ifanc gael gafael ynddyn nhw – penaethiaid diwerth, ysgrifenyddion ysgol effeithlon, gwraig swper ffiaidd, a chriw o ddihirod llyfrau comig!” meddai Tim Howe, Uwch Reolwr Ieuenctid a Chymuned Torch a ysgrifennodd yr addasiad ac sy’n cyfarwyddo’r theatr ieuenctid.

“Mae bomiau drewdod, herwgipio, abseilio, hunaniaeth gyfeiliornus a dos trwm o guddwisgoedd comig oll yn ymddangos yn y ddrama hon, a fydd yn swyno ein cynulleidfaoedd! Os gwelsoch chi The Wind In The Willows y llynedd, fe fyddwch chi’n gwybod yn union beth i’w ddisgwyl gan ein pobl ifanc, ac mae hon yn argoeli i fod yn noson yn y theatr na fydd yn eich siomi!” meddai Tim sy’n edrych ymlaen i’ch gweld chi a’ch pobl ifanc yn ymuno yn yr hwyl.

Ond nid yw haf o hwyl y Torch yn dod i ben ym mis Gorffennaf. Mae eu hysgolion haf, y mae galw mawr amdanynt, yn dychwelyd ar gyfer gweithgareddau creadigol llawn hwyl.

“Ein darpariaethau Ysgol Haf yw uchafbwynt hafau llawer o bobl, yn enwedig gan ein bod wedi ehangu ein cyrsiau i gynnwys opsiwn ar gyfer oedolion. Rydym mor falch, diolch i’n noddwyr Awdurdod Porthladd Aberdaugleddau ac Ymddiriedolaeth Elusennol Ingles y gallwn barhau i gynnig yr holl ddarpariaethau yma am bwyntiau pris hygyrch, gydag amrywiaeth o gynlluniau talu ar gael,” meddai Tim.

Eleni, mae’r Torch yn cynnig Dramatic Detectives ar gyfer pobl ifanc saith i 11 oed, yn ddyddiol rhwng 10am a 3pm, dydd Llun 4 i ddydd Gwener 8 Awst, Playmakers ar gyfer plant 11-18 oed rhwng 10am a 4pm, dydd Llun 11 tan ddydd Gwener 15 Awst, a Show Off! i rai 18 oed a throsodd gan groesawu awduron, cantorion a pherfformwyr ... Croesewir pob talent ar gyfer yr Ysgol Haf i Oedolion sy'n digwydd ar nos Iau drwy gydol mis Awst gyda pherfformiad yn dangos yr holl dalentau ar ddydd Sadwrn 30 Awst.

“Mae ein hysgolion haf ar gyfer dechreuwyr llwyr yn ogystal â'r rhai sydd am loywi eu sgiliau dramatig. Mae croeso i bawb a'r peth gorau am ein hysgolion haf yw nad oes clyweliad i ymuno â ni, gallwch chi droi i fyny a chymryd rhan” meddai Tim.

Gan ddod i glo, meddai Tim: “Ni allwn aros i’ch croesawu i’r Torch yr haf hwn, naill ai fel cyfranogwr neu aelod o’r gynulleidfa! Ac os hoffech chi gefnogi unrhyw ran o’r gwaith anhygoel hwn ar gyfer ein cymuned yna edrychwch ar ein cynlluniau aelodaeth neu sut mae gwneud cyfraniad – eich haelioni chi sy’n ein helpu i ddarparu lle creadigol diogel i bobl, rhoi’r hyder iddyn nhw ddod o hyd i’w llais, a’r dewrder i fod yn pwy maen nhw am fod.”

I gael rhagor o wybodaeth, ewch i wefan Theatr Torch www.torchtheatre.co.uk neu ffoniwch y Swyddfa Docynnau ar (01646) 695267.